शेंदुर्णी नगरपंचायत हद्दीत मतदार यादीतील प्रलंबित मॅपिंग पूर्ण करण्यासाठी 23 आणि 24 मे 2026 रोजी विशेष शिबिर आयोजित करण्यात आले आहे. सकाळी 9 ते सायंकाळी 5 या वेळेत हे शिबिर नगरपंचायत कार्यालयात होणार आहे.
विशेष सखोल पुनरिक्षण कार्यक्रमाअंतर्गत ही मोहीम राबविण्यात येत असून मतदार यादी अधिक अचूक आणि अद्ययावत करण्याचा प्रशासनाचा उद्देश आहे. मॅपिंग अपूर्ण असलेल्या नागरिकांना या शिबिरात थेट सुविधा मिळणार आहेत.
शिबिरात केंद्रस्तरीय अधिकारी आणि बीएलओ यांच्या माध्यमातून प्रत्यक्ष मॅपिंग प्रक्रिया पूर्ण केली जाणार आहे. नागरिकांनी आपले ओळखपत्र, आवश्यक कागदपत्रे आणि संबंधित माहिती घेऊन उपस्थित राहावे, असे प्रशासनाने सांगितले आहे.
शेंदुर्णी नगरपंचायतीचे मुख्याधिकारी विवेक धांडे यांनीही नागरिकांना या संधीचा लाभ घेण्याचे आवाहन केले आहे. प्रलंबित मतदार मॅपिंग वेळेत पूर्ण व्हावे, यासाठी सर्वांनी सहकार्य करावे, असे त्यांनी नमूद केले.
आगामी निवडणुकांच्या पार्श्वभूमीवर मतदार यादीची अचूकता महत्त्वाची असल्याने या उपक्रमाला विशेष महत्त्व आहे. पात्र मतदारांनी वेळ न दवडता शिबिरात सहभागी होऊन आपली नोंद अद्ययावत करून घ्यावी, असे आवाहन प्रशासनाने केले आहे.
